🌷ओढ खान्देशनी🌹

ओढ लागणी माले मना खान्देशनी,
जाणं शे माले मना  खान्देशमा,
लागी गई आते शायाले सुट्टी,
म्हणीसन  जाणं शे माले  मना  खान्देशनमा.
ओढ लागणी  माले मना खान्देशनी ।।१।।

परत नाचणं शे माले,
मना कानबाईन्या तिरयातिसमा, लेना शे आशिर्वाद माले,
मना भोलेनाथना.
ओढ  लागणी  माले  मना  खान्देशनी ।।२।।

खेणं  शे माले,
सातपाऊली,  पाचपाऊली,
नि त्या सुरपारंबीनी,
तर मजाच भारी
ओढ  लागणी  माले  मना  खान्देशनी ।।३।।

जानं शे  माले,
त्या नदयास्ना कुशीमा ,
झेपनं  शे माले,
गिरना नि तापीमा
ओढ  लागणी  माले  मना  खान्देशनी ।।४।।

लावणं  शे माले,
त्या आहिराणी गाणा,
मचाडनी शे धूम,
माले त्या लगीनस्मा
ओढ  लागणी  माले  मना  खान्देशनी ।।५।।

देखना शे माले,
तो मजाना तमासा,
रातभर  जागी राहीसन,
हया खान्देशना जञास्मा
ओढ लागणी माले मना खान्देशनी ।।६।।

परत  चोरण्या शेत कैरया,
त्या दुसऱ्याना वावरमाईन,
खाना शे पाहुणचार,
तो आंबाना  डो  ना,
ओढ लागणी माले मना खान्देशनी ।।७।।

पेरणं शे माले,
मनी आहिराणीना बिया,
रुजवणी  शे माले आहिराणी संस्कृती,
त्या खान्देशना धरञीमा ।।८।।

ओढ  लागणी  माले  मना  खान्देशनी,
जानं शे माले मना खान्देशमा,
लागी गई  आते  शायाले  सुट्टी, म्हणीसन  जाणं  शे माले  मना  खान्देशमा,
ओढ  लागणी  माले  मना  खान्देशनी ।।९।।


            चेतन पाटील
            कल्याण
      🙏 जय खान्देश🙏